Isagoo Tiktok Live ku Caynaya Islaamka ayaa la Dilay

Salwaan Mumika oo ahaa nin haysta diinta Kirishtaanka kana soo jeeda dalka Ciraaq waxa uu ku caan baxay inuu si joogta ah ugu u aflagaadeeyo Diinta Islaamka.

Waxa uu shaqo ka dhigtay inuu si joogta ah u caayo Allah SWT, rasuulkiisa Maxamed CSW, khaatimal Anbiyaa’i wal Mursaliin, iyo diinta Islaamka.

Waxa uu oran jiray “Diinta Islaamka waa in laga mamnuucaa adduunka, sababtoo ah lama jaanqaadi karto nolosha qarnigan la joogo,” waa sida uu hadalka u dhigay.

Waxa uu intaa raaciyay in diinta Islaamku “ay ku xadgudubto xuquuqda haweenka, xoriyatul qowlka, dimoqraadiyadda,” iyo waxa uu u yaqaan ilbaxnimada.

Ninkan aad ayuu ugu fogaaday inuu badiyo cayda diinta Islaamka, isagoo baadiyaysan heer ay ku adkaatay inuu dib usoo laabto oo uu ka towbad keeno xumaanta uu u qabo Islaamka.

Salwaan Mumiki isagoo la dagaalamaya dhaqanka dadka Islaamka, islamarkaana isku dayaya inuu caro u bedelo maalin farxadeed ayuu bishii July  2023dii maalin ay ku beegnayd Ciida Carafa wuxuu meel fagaare ah oo magaalada Stockholm ka mid ah ku gubay koobi ka mid ah Kitaabka Qur’aanka, isagoo ay waardiye ka hayaan ciidamo boolis ah.

Tallaabadaas uu Salwaan ku gubay kitaabka Qur’aanka waxaa ka carooday Muslimiinta dunida daafaheeda ku nool iyo dad aan Muslim ahayn oo dulmiga neceb.

Falcelintii ka dhalatay ficilkiisa waxaa ka mid ahayd in laba jeer dadweyne caraysan weerar ku qaadaan dhismaha safaaradda Sweden ay ku leedahay dalka uu ka soo jeedo ninkan kitaabka gubay ee Ciraaq.

Weerarka labaad ee muslimiinta Ciraaq ay ku qaadeen dhismaha safaaradda Sweden ee magaalada Baqdaad waxaa suurtagashay in dab la qabadsiiyo.

Xitaa wuxuu sababay in rabshado iyo amni darro ay ka dhacdo magaalada Stockholm, taasoo sababtay in Sweden ay dib u fekerto, sababta khasaarahan ay u wajahayso, iyo shaqsiga ka mas'uulka ah iyo ujeedka uu ka leeyahay in kharbudaadan ay dhacdo.

Wixii markaa ka dambeeyay Sweden waxay ku dhawaaqday digniin argagixiso heerka labaad ah - iyadoo ka digaysa halis argagixiso ka dhan ah muwaadiniinteeda ka  dib markii si weyn looga carooday fal uu dalkeeda ka sameeyay nin qaxooti ah oo dalkiisa ka soo cararay.

Xiliga ay arrintaasi dhacayso, Sweden waxay dadaal ugu jirtay inay ku biirto Gaashaan Buurta NATO, waxaana ka hortaagnaa madaxweynaha dalka Turkiga, Recep Dayib Erdogan, oo xujo uga dhigay ku biirista Sweden ee NATO inay wax ka bedesho sharcigeeda ay ugu yeerto xoriyatul qowl ee fududaynaya in si fudud meel ka dhac loogu sameeyo diimaha, gaar ahaan diinta Islaamka.

Wixii markaa ka dambeeyay, laanta socdaalka Sweden waxay dabagal ku sameysay sifada sharciga ah ee uu ku joogo ninka kitaabka gubay, kaasoo ay ku eedeeyeen inuu been ka sheegay aqoonsigiisa, ka dibna ay u sheegeen inuu wajahayo tarxiil.

Dacwad oogayaal Swedish ah ayaa dacwad ku soo oogay Salwan Mumika iyo Salwan Najem, kuwaasoo afar goobood oo kala duwan kitaabka qur’aanka koobi ka mid ah ku gubay.

Waxaa lagu furay dacwad isaga iyo saaxiibkiis ka dhan ah, taasoo salka ku haysay inuu sameeyay madax adayg iyo rabsho ka dhan ah qowmiyad, inkastoo dowladda Sweden aysan si toos ah u tilmaamayn magaca qowmiyadda, haddana cid kastaa way fahmi kartaa in loola jeedo dadka Islaamka.

Dacwad-ooge Anna Henkio ayaa sheegtay in labadan nin ay ku xadgudbeen sharciga xoriyatul-qowlka sweden, ujeedkooda ay ku gubeen kitaabka Qur’aanka inuu ahaa in ay sumcad dil ku sameeyaan caqiidada dadka Islaamka, taasoo sharcigu uu diidayo.

Anna ayaa sheegtay inay hayso caddeymo iyagoo aflagaadeynaya Qur’aanka iyo dadka aaminsan diinta Islaamka.

Markii la furay kiiskaasi ka dib, Salwaan waxaa laga saaray gurigii uu deganaa ee dowladda Sweden cayrta ku siin jirtay. 

Kitaab Gube Salwaan waxaa soo wajahday nolol adag, ka dib markii gurigii laga saaray, xaalad wuxuu galay dhuumasho ah, iyadoo markaa laanta socdaalku ay diyaarinaysay inay musaafuriso.

Bishii March sannadkii 2024, waxa uu u baxsaday dalka Norway, halkaasi ayuu magangelyo weydiistay, isagoo ku eedaynaya dalka Sweden inay ka been sheegeen ilaalinta xorriyatul qolka.

Norway ayaa Salwan Mumiki dib ugu soo celisay dalka Sweden oo ay maxkamadi kaga furnayd.

Nolosha ayaa ku adkaatay, waxaa uu gaaray heer uu koob shaah ah iibsan kari waayo. Baraha bulshada, gaar ahaan Tiktok ayuu ka dawarsan jiray, dad xumaantiisa taageera ayaa wax la yiraahdo Coins u diri jiray.

Qareeno ayaa u dooday, ugu dambeyntiina waxaa la siiyay guri uu si kmg ah ugu noolaado inta laga aqbalayo amma la diidayo codsi magangeliyo oo uu xaraystay.

Kitaab Gube Salwaan Mumiki waxaa la dilay isagoo live ugu jira barta Tiktok, uuna aflagaadaynayo diinta Islaamka.

Dadkii livekiisa daawanayay waxay maqleen dhawaqa rasaastii lagu dilay, dhulka ayuu ku dhacay, nin kaloo la joogay oo aflagaadada islaamka qeyb ka ahaana wuu dhaawacmay.

Deriskiisa oo maqleen xabadaha ayaa wacay booliska. Booliska ayaa yimid waxana uu arkay Salwan oo dhaawac daran qaba oo dhulka yaalla iyo saaxiibkiis oo dhaawac fudud soo gaaray

Tiktok live-kiisa waa shidnaa ilaa boolisku ay yimaadeen, ka dibna ay damiyeen.

Salwaan iyo saaxiibkiis halkaa ayaa laga qaaday, waxaana saacado ka dib lagu shaaciyay Salwaan inuu u dhintay dhaawacii soo gaaray.

Noloshii Salwaan Mumiki waxay kusoo afjarantay isagoo ku gudo jira xumaantii uu ku caan baxay ee ay ka mid ahayd u gefidda Alle SWT, Rasuulkiisa Maxamed CSW, khaatimal ambiyaa'i wal mursaliin, iyo ummada Islaamka.